عید کے دن بجلی کا تار گرنے سے 2 نوجوان جاں بحق

سکھیکی: پنجاب کے ضلع حافظ آباد میں 2 موٹر سائیکل سوار نوجوان گزشتہ روز بجلی کا تار گرنے سے جاں بحق ہو گئے۔

تفصیلات کے مطابق ضلع حافظ آباد کے شہر پنڈی بھٹیاں میں نواحی گاؤں جندراکہ میں عید کی خوشیاں غم میں تبدیل ہو گئیں، موٹر سائیکل سوار بدقسمت نوجوانوں پر بجلی کا تار ٹوٹ کر گر گیا۔

واقعے میں موٹر سائیکل سوار دو نوجوان جاں بحق ہو گئے جب کہ تیسرا زخمی ہو گیا ہے، بتایا جا رہا ہے کہ بجلی کا تار بوسیدہ ہو چکا تھا، جس کی زد میں آ کر نواحی گاؤں جندراکہ کا رہائشی وقاص موقع ہی پر جاں بحق ہوا جب کہ علی کی حالت تشویش ناک تھی تاہم وہ بھی جاں بر نہ ہو سکا، تیسرے زخمی کی حالت خطرے سے باہر بتائی جاتی ہے۔

سرگودھا لاہور روڈ پر نوجوان کی لاش رکھ کر ورثا نے احتجاج کیا

رپورٹس کے مطابق جاں بحق نوجوان آپس میں کزن ہیں، عید کے دن تفریح کے لیے نکلے تھے اور ہوٹل پر کھانا کھانے آئے تھے، اسی دوران اوپر سے گزرنے والی 11kv کی تار ٹوٹ کر گر گئی اور کرنٹ لگنے سے وقاص اور علی جاں بحق ہو گئے۔

جاں بحق ہونے والوں کے ورثا نے گیپکو کے خلاف احتجاج کیا اور لاشیں لاہور سرگودھا روڈ پر رکھ کر روڈ بلاک کر دیا، اور ٹائر جلائے۔

The post عید کے دن بجلی کا تار گرنے سے 2 نوجوان جاں بحق appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/39LZpeK
via IFTTT