ملک بھرمیں جشن عید میلادالنبی ﷺ عقیدت و احترام سے منایا جارہا ہے

ملک بھر میں جشن عید میلاد النبیﷺ آج نہایت عقیدت و احترام سے منایا جا رہا ہے۔

آقائے دو جہاں نبی آخر الزماں حضرت محمد مصطفیٰؐ کے جشن ولادت کے روز صبح بہاراں كا آغاز بارگاہ رسالتﷺ میں ہدیہ درود و سلام اور اجتماعی دعاؤں سے ہوا جس میں ملک کی سلامتی و خوشحالی کے لیے بھی دعائیں مانگی گئیں۔ جشن عید میلاد النبی ﷺ کے سلسلے میں ملک کے چھوٹے بڑے شہروں میں جلسے جلوسوں اور ریلیوں کا اہتمام کیا جائے گا جن میں حضور نبی کریمﷺ سے محبت کا اظہار کیا جائے گا، عاشقان رسولﷺ اپنے اپنے انداز میں والہانہ محبت کا اظہار کریں گے۔

عیدمیلادالنبی ﷺ کےسلسلے میں پاک فوج کی جانب سے وفاقی دارالحکومت اسلام آباد میں 31 جب کہ صوبائی دارلحکومتوں کراچی، لاہور، پشاور اور کوئٹہ میں 21، 21 توپوں کی سلامی دی گئی۔ اس موقع پر فضائیں اللہ اکبر کے نعروں سے گونج اٹھیں جب کہ پاک فوج کے جوانوں نےعزم کا اظہارکیا کہ ملک کی سلامتی اور دین مصطفیٰ ﷺ کے لئے کسی بھی قربانی سے دریغ نہیں کیا جائے گا

ملک کے مختلف شہروں میں جلسوں سے جید علمائے کرام خطاب کریں گے جن میں سیرت النبیﷺ بیان کی جائے گی۔ کراچی میں جماعت اہلسنت پاکستان کے تحت عید میلاد النبیﷺ کا مرکزی جلوس نیومیمن مسجد بولٹن مارکیٹ سے برآمد ہوگا۔

ملک بھر میں جشن عید میلادالنبیﷺ کے سلسلے میں عاشقان رسول ﷺ نے اپنے گھروں کو خوبصورت برقی قمقموں سے سجا رکھا ہے جب کہ پارلیمنٹ ہاؤس، وزیراعظم ہاؤس، ایوان صدر سمیت سرکاری و غیر سرکاری عمارتوں کو بھی خوبصورتی سے سجایا گیا ہے۔ اس کے علاوہ مختلف شہروں میں خانہ کعبہ اور مسجد نبوی ﷺ کے خوبصورت ماڈل بھی سڑکوں پر رکھے گئے ہیں جو عوام کی توجہ کا مرکز بنے ہوئے ہیں۔

جشن عید میلاالنبیﷺ کے سلسلے میں سیکیورٹی پلان بھی ترتیب دیا گیا ہے جس کے تحت جلوسوں کی مرکزی گزرگاہیں اور اس سے ملحقہ سرکیں ٹریفک کے لیے مکمل طور پر بند کی جائیں گے جب کہ جلوس میں شامل ہونے والوں کو جامع تلاشی کے بعد جانے کی اجازت دی جائے گی۔

The post ملک بھرمیں جشن عید میلادالنبی ﷺ عقیدت و احترام سے منایا جارہا ہے appeared first on ایکسپریس اردو.

source https://www.express.pk/story/2099366/1