معروف امریکی کمپنی نے افغان مہاجرین کو بڑی خوشخبری سنادی

دنیا بھر میں سیاحت اور دیگر مقاصد کے لیے عارضی رہائش فراہم کرنے والی آن لائن امریکی کمپنی ائیر بی این بی نے بیس ہزار افغان مہاجرین کو مفت رہائش فراہم کرنےکا اعلان کردیا ہے۔

کمپنی کے چیف ایگزیکٹیو برائن چیسکی نے سماجی رابطے کی ویب سائٹ ٹوئٹر پر جاری بیان میں کہا کہ ہمارا مقصد وقت کے سب سے بڑے انسانی بحران میں اپنا کردار ادا کرنا ہے، ہمیں لگتا ہے کہ اس وقت ہمیں ان لوگوں کی مدد کے لیے اقدامات کرنے چاہئیں۔

برائن چیسکی کا کہنا تھا کہ وقت ضائع کرنےکی کوئی گنجائش نہیں ہے، امید ہے کہ دیگر کاروباری ادارے بھی اس موقع پر اپنا کردار ادا کرینگے۔

The displacement and resettlement of Afghan refugees in the US and elsewhere is one of the biggest humanitarian crises of our time. We feel a responsibility to step up.

— Brian Chesky (@bchesky) August 24, 2021

ائیر بی این بی کے چیف ایگزیکٹیو کا کہنا تھا کہ ایسے وقت جب ہزاروں افغان شہری دیگر ممالک میں دوبارہ سے اپنی زندگی شروع کرنے جارہے ہیں تو انہیں سب سے پہلے رہائش کے مسئلے کا ہی سامنا ہوگا، اس لیے مجھے امید ہےکہ بیس ہزار افغان شہریوں کے لیے دنیا بھر میں ائیر بی این بی کمیونٹی نا صرف ان کا پرجوش استقبال کرے گی بلکہ انہیں نئی زندگی کی شروعات میں عارضی طور پر ایک محفوظ رہائش مہیا کرے گی۔

کمپنی کے چیف ایگزیکٹیو برائن چیسکی کا کہنا تھا کہ آج سے ہی بیس ہزار افراد کو مفت عارضی رہائش فراہم کرنے کا سلسلہ شروع کررہے ہیں، اس کے لیے میزبانوں کو کمپنی ادائیگی کرے گی تاہم یہ سب ان کی مہربانی اور سخاوت کے بغیر ممکن نہیں ہے۔

Starting today, Airbnb will begin housing 20,000 Afghan refugees globally for free.

— Brian Chesky (@bchesky) August 24, 2021

واضح رہے کہ کابل پر طالبان کے دوبارہ کنٹرول حاصل کرنے کے بعد سے ہزاروں افغان شہری ملک چھوڑ چکے ہیں جب کہ ہزاروں افراد یورپ یا امریکا میں پناہ حاصل کرنا چاہتے ہیں اور بڑی تعداد میں کابل ائیرپورٹ پر موجود ہیں۔

The post معروف امریکی کمپنی نے افغان مہاجرین کو بڑی خوشخبری سنادی appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/3gAE24G
via IFTTT