نئے سال میں بھی اچھی کارکردگی دکھانے کی کوشش کروں گی، ندا ڈار

کراچی : پاکستان ویمن ٹیم کی کھلاڑی ندا ڈار نے کہا ہے کہ سال 2022 میرے لیے بہت اچھا ثابت ہوا، آئندہ بھی ایسی کارکردگی دکھانے کی کوشش کروں گی۔

ویمن ٹیم کی آل راؤنڈر ندا ڈار نے کہا کہ کرکٹ بورڈ کے کوچنگ اسٹاف اور دیگر ساتھی کھلاڑیوں نے مجھے بہت سپورٹ کیا۔

نجی ٹی وی سے گفتگو کرتے ہوئے ان کا کہنا تھا کہ میری کارکردگی میں بسمہ معروف کا بھی اہم کردار ہے، بسمہ کے ساتھ کافی پارٹنر شپس لگیں، عالیہ کے ساتھ بھی شراکت رہی، دوسری لڑکیوں کو بھی میری کارکردگی سے حوصلہ ملا۔

انہوں نے کہا کہ میری ہمیشہ اپنے ملک کیلئے اچھی کارکردگی دکھانے کی کوشش رہی ہے، سال 2019 کے بعد سے بہت سی کامیابیاں ملیں، ایوارڈز اور اس کیلئے نامزدگی سے ہمیشہ مزید بہتر کرنے کا حوصلہ ملتا ہے، کوشش ہے کہ آئندہ آنے والے برسوں میں بھی ایسی کارکردگی دکھاؤں۔

انہوں نے کہا کہ بہترین پلیئر کیلئے نامزد ہونا بھی بڑی بات ہے، اللہ نے چاہا تو ایوارڈ بھی ملے گا، 2022 میں ایشیا کپ میں انڈیا اور کامن ویلتھ گیمز میں بارباڈوس کیخلاف پرفارمنس یادگار ہیں، کوشش ہوگی کہ ورلڈ کپ میں پاکستان کی بہترین آل راؤنڈر بنوں۔

ندا ڈار نے مزید کہا کہ عالمی آل راؤنڈر رینکنگ میں میرا ساتواں نمبر ہے خواہش ہے کہ ٹاپ ٹو میں آؤں اور پاکستان کیلئے مزید دو سال کھیلوں۔

ایک سوال کے جواب میں ان کا کہنا تھا کہ ورلڈ کپ سے قبل آسٹریلیا سے سیریز تیاریوں میں مددگار ثابت ہوگی، اچھی ٹیم کیخلاف کھیل کر ہمیں اعتماد بھی ملے گا اور کھیل بہتر ہوگا۔

from ARYNews.tv | Urdu – Har Lamha Bakhabar https://ift.tt/lqvt1Da
via IFTTT