کراچی میں اسٹریٹ کرائمز کے ساتھ ٹریفک حادثات بھی بڑھ گئے، 3 جاں بحق

کراچی: شہر قائد میں اسٹریٹ کرائمز کے ساتھ ساتھ ٹریفک حادثات میں بھی اضافہ ہو رہا ہے، شہر کے مختلف علاقوں میں ٹریفک حادثات میں 3 افراد جان سے ہاتھ دھو بیٹھے ہیں۔

تفصیلات کے مطابق کراچی میں مختلف مقامات پر ٹریفک حادثات میں تین افراد جاں بحق ہو گئے، لانڈھی بابر مارکیٹ میں بس کی ٹکر سے موٹر سائیکل پر سوار دو افراد جان سے گئے۔

حادثے کے بعد ڈرائیور فرار ہو گیا، پولیس نے بس قبضے میں لے لی، اسپتال ذرایع کے مطابق جاں بحق ہونے والوں کی عمریں 18 اور 22 سال ہیں، جن کی شناخت شیری ولد ولی محمد اور ہدایت اللہ ولد غلام رسول کے ناموں سے ہوئی ہے، دونوں آپس میں دوست اور لانڈھی محمد نگر کے رہایشی تھے۔

ایک اور حادثہ سپر ہائی وے پر پیش آیا، سپر ہائی وے جمالی پل کے قریب ڈمپر کی ٹکر سے ایک موٹر سائیکل سوار جاں بحق ہو گیا۔

دوسری طرف اسٹریٹ کرائمز بھی عروج پر ہیں، کراچی کے علاقے سچل تھانے کی حدود میں اسٹریٹ کرائم کی واردات کی سی سی ٹی وی فوٹیج اے آر وائی نیوز نے چلائی، فوٹیج میں دیکھا گیا کہ صفورا کے قریب ملزم نے گلی کی مکمل ریکی کی، اور موقع ملتے ہی گاڑی سے اے سی اور ڈیجیٹل سسٹم نکال کر فرار ہو گیا۔ سولجر بازار تھانے کی حدود میں گارڈن کے قریب بھی ایک موٹر سائیکل چوری کی گئی جس کی سی سی ٹی وی فوٹیج بھی اے آر وائی نیوز نے حاصل کی، ملزم نے سڑک پر کھڑی موٹر سائیکل پر بیٹھ کر ارد گرد کا جائزہ لیا، اور منٹوں میں موٹر سائیکل اسٹارٹ کی اور لے اڑا، ایک شہری نے واقعے کی رپورٹ سولجر بازار تھانے میں درج کرا دی ہے۔

فائرنگ کا بھی ایک واقعہ پیش آیا، کراچی کے علاقے اورنگی ٹاؤن اردو چوک کے قریب فائرنگ سے ایک نوجوان زخمی ہوا، ریسکیو ذرایع کے مطابق واقعہ ڈکیتی پر مزاحمت کا نتیجہ تھا، زخمی کو اسپتال منتقل کیا گیا۔

The post کراچی میں اسٹریٹ کرائمز کے ساتھ ٹریفک حادثات بھی بڑھ گئے، 3 جاں بحق appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/2QtN72y
via IFTTT