ریلوے کے پاس 38 کینال جگہ موجود، وزیر اعظم فیصلہ کریں گے کیا کرنا ہے: شیخ رشید

کراچی: وفاقی وزیر ریلوے شیخ رشید کا کہنا ہے کہ کراچی میں جتنی بھی اہم جائیدادیں ہیں ان کو واپس لینے کا فیصلہ کیا ہے، اپنی زمین سندھ حکومت کو دیں گے، ہمارے پاس 38 کینال جگہ موجود ہے۔

تفصیلات کے مطابق وفاقی وزیر ریلوے شیخ رشید نے نیوز کانفرنس کرتے ہوئے کہا کہ ریلوے افسران کی میٹنگ کے بعد فیصلہ کیا اپنی زمین سندھ حکومت کو دیں گے، 31 کینال زمین خالی کروالی، 5 کینال خالی کروانا باقی ہے۔

شیخ رشید کا کہنا تھا کہ کراچی میں جتنی بھی اہم جائیدادیں ہیں ان کو واپس لینے کا فیصلہ کیا ہے، پراپرٹی واپس لینے کے فیصلے کا مقصد ریلوے کی آمدن میں اضافہ کیا جا سکے۔ ہمارے پاس 38 کینال جگہ موجود ہے اور یہ زمینیں کس طرح استعمال ہوں گی فیصلہ وزیر اعظم کریں گے۔

انہوں نے کہا کہ جو افسر اہل ہیں وہ ریلوے میں کام کر رہے ہیں، کراچی ریلوے کی شہ رگ ہے۔ میں نے 2 یونیورسٹیاں راولپنڈی میں بنائی ہیں۔ سندھ میں ریلوے یونیورسٹی ایم ایل ون کے تحت بنے گی۔ حکومت سے مل کر اسپتالوں کو اپ گریڈ کرنے جا رہے ہیں۔ ریلوے کے اسپتالوں کو پرائیوٹائز کیا جائے گا۔ ایم ایل ون سے ایک لاکھ لوگوں کو روزگار ملے گا۔

شیخ رشید کا کہنا تھا کہ گزشتہ سال 4 ارب روپے خسارہ کم کیا، رواں سال 6 ارب کم کریں گے۔ 40 ارب روپے پنشن کی مد میں ریلوے اپنی جیب سے دیتی ہے۔ ریلوے کو سبسڈی ملے گی تو اس کو بھی ختم کردیں گے۔

انہوں نے کہا کہ لاہور سے ذمہ دار افسران کا تبادلہ کراچی کر رہے ہیں، ایم ایل ون کراچی سمیت پورے ملک کی ضرورت ہے۔ کوئی نئی ٹرین چلانے کے لیے ہمارے پاس گنجائش ہی نہیں ہے۔ کوئی ہم سے ٹرین کرائے پر لینا چاہتا ہے تو بے شک لے لے۔

وفاقی وزیر کا مزید کہنا تھا کہ افغان ٹرانزٹ ٹریڈ کے لیے ٹرین چلانے جا رہے ہیں، ٹرین چلنے سے اسمگلنگ کی روک تھام میں مدد ملے گی۔

from ARYNews.tv | Urdu – Har Lamha Bakhabar https://ift.tt/2UhgU0X
via IFTTT