پاکستان اسٹاک ایکسچینج پر دہشت گردوں کا حملہ ناکام ، 4 حملہ آوروں سمیت 5 ہلاک

کراچی: ملک دشمن عناصر کی امن خراب کرنے کی کوشش ناکام بنا دی گئی، پاکستان اسٹاک ایکسچینج کی حدود میں فائرنگ اور دستی بم حملہ کرنے والے 4 دہشت گرد مارے گئے، جب کہ پولیس اہل کار سمیت 3 افراد زخمی ہو گئے ہیں۔

اے آر وائی نیوز کے مطابق آج صبح پاکستان اسٹاک ایکسچینج پر کاروباری ہفتے کے پہلے روز دہشت گردوں نے دستی بم کے ساتھ حملہ کیا، جسے سیکورٹی اداروں نے ناکام کرتے ہوئے چار حملہ آوروں کو مار دیا، واقعے میں ایک شہری بھی جاں بحق ہوا۔

پولیس کا کہنا ہے کہ جوابی فائرنگ میں چار دہشت گرد مارے گئے ہیں جنھوں نے مبینہ طور پر سیکورٹی گارڈز کے کپڑے پہنے تھے۔ حملہ آوروں نے 10 بج کر 5 منٹ پر پانچ سے 7 منٹ تک فائرنگ کی۔

ایدھی حکام نے واقعے میں 5 افراد کے جاں بحق ہونے کی تصدیق کی ہے، جب کہ تین زخمی ہیں۔ پولیس نے موقع پر پہنچ کر سڑک کو ٹریفک کے لیے بند کر دیا، جب کہ زخمیوں کو اسپتال منتقل کیا گیا۔

اے آر وائی فوٹیج کے مطابق دہشت گرد نیلے رنگ کی کرولا کار میں آئے، چار دہشت گردوں نے مرکزی دروازے سے اندر داخل ہوتے ہوئے فائرنگ کی، تاہم سیکورٹی اہل کاروں نے جوابی کارروائی میں ایک دہشت گرد کو گیٹ پر ہی مار دیا اور دہشت گردوں کو عمارت کے اندر داخل نہیں ہونے دیا۔

ماہر معاشیات مزمل اسلم نے اے آر وائی نیوز کو بتایا کہ اسٹاک مارکیٹ کی عمارت میں اس وقت 2 ہزار کے قریب لوگ موجود ہیں، کچھ دیر قبل اچانک پہلے فائرنگ ہوئی اور پھر ٹریڈنگ ہال کے باہر دستی بم حملے کی اطلاع ملی۔ انھوں نے کہا یہ ہائی سیکورٹی زون ہے، یہاں حملہ ہونا حیران کن ہے۔

پولیس اور رینجرز کی بڑی نفری نے عمارت کے اندر اور علاقے کو گھیر لیا ہے، یہ علاقہ حساس کہا جاتا ہے، علاقے میں اہم دفاتر بھی موجود ہیں، لوگوں کا رش رہتا ہے، سیکورٹی بھی سخت رہتی ہے، پولیس اس دہشت گردانہ حملے کی تحقیقات کر رہی ہے، دوسری طرف آئی آئی چندریگر روڈ پر ایمرجنسی نافذ کر دی گئی ہے۔

پاکستان اسٹاک ایکسچینج کی عمارت میں سرچ اینڈ کلیئرنس کا عمل جاری ہے، عمارت کے سامنے ایک مشکوک گاڑی کی تلاشی بھی لی جا رہی ہے، دوسری طرف کاروبار بھی جاری ہے اور سیکورٹی صورت حال کنٹرول میں ہے۔

The post پاکستان اسٹاک ایکسچینج پر دہشت گردوں کا حملہ ناکام ، 4 حملہ آوروں سمیت 5 ہلاک appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/3dJsSXh
via IFTTT