امریکی فوج نکلنے کے بعد کابل میں طالبان کا جشن

کابل : افغانستان سے امریکہ کے آخری طیارے کے جاتے ہی منگل کی صبح کابل میں ہوائی فائرنگ اور آتش بازی کے مناظر دیکھنے کو ملے جب طالبان جنگجو اپنی فتح کا جشن مناتے رہے۔

روئٹرز کے مطابق پنٹاگون نے اعلان کیا کہ آخری امریکی پرواز پیر کی رات کے آخری منٹ روانہ ہوئی اور اب تمام امریکی فوجی افغانستان  سے باہر چلے گئے ہیں۔

طالبان ترجمان نے بھی اعلان کرتے ہوئے ٹوئٹر پر کہا کہ آج رات 12 بجے باقی امریکی فوجی بھی کابل ایئر پورٹ چھوڑ گئے اور  20 سال بعد ہمارے ملک کو  مکمل آزادی مل گئی۔

مختلف ذرائع سے ملنے والی اطلاعات کے مطابق کاْبل ایئر پورٹ پر طالبان کی 313بدری فوج کے اہلکاروں نے سجدہ شکر  اداکیا،  اس کے علاوہ اہلکاروں نے خوشی میں ہوائی فارنگ بھی کی۔

قبل ازیں اقوام متحدہ کی سکیورٹی کونسل نے پیر کو ایک ہنگامی اجلاس میں قراردار منظور کی جس میں طالبان پر زور دیا گیا تھا کہ وہ اپنے وعدے پر قائم رہیں گے کہ ملک چھوڑنے والوں کو جانے کی مکمل آزادی ہوگی۔

تاہم اس قرارداد میں انخلا کے لیے کابل میں محفوظ زون قائم کرنے کا کوئی ذکر نہیں تھا جس کے بارے میں فرانسیسی صدر ایمانوئل میکروں گذشتہ روز کہہ چکے تھے۔

اجلاس میں برطانیہ، امریکہ اور فرانس کی جانب سے پیش کی گئی قرارداد کو 13 ووٹوں سے منظور کیا گیا تھا جس میں کہا گیا کہ سکیورٹی کونسل یہ توقع کرتی ہے کہ طالبان افغانستان سے جانے والے تمام افغانوں اور غیرملکیوں کو محفوظ اور منظم طریقے سے انخلا کرنے دیں گے۔

The post امریکی فوج نکلنے کے بعد کابل میں طالبان کا جشن appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/3BnLsjV
via IFTTT