خواتین کو با اختیار بنانے کے لیے اپنی کوششیں جاری رکھیں گے: وزیر خارجہ

اسلام آباد: وزیر خارجہ شاہ محمود قریشی نے کہا ہے کہ ہم خواتین کو با اختیار بنانے کے لیے اپنی کوششیں جاری رکھیں گے، خواتین پر تشدد روکنے اور ان کے حقوق کے تحفظ کے لیے ہماری حکومت قانون سازی کے لیے کوشاں ہے۔

تفصیلات کے مطابق وزیر خارجہ شاہ محمود نے گزشتہ روز خواتین سے متعلق چوتھی عالمی کانفرنس کی 25 ویں سالگرہ کے موقع پر منعقدہ اجلاس سے بذریعہ ویڈیو لنک خطاب کیا، انھوں نے کہا کہ ہم اقوام متحدہ کے آغاز ہی سے خواتین کے حقوق کے لیے کام کرتے آ رہے ہیں، ہماری قومی ترقی کا رخ صنفی احسا س پر مبنی ہے۔

وزیر خارجہ شاہ محمود نے کہا گزشتہ صدی میں خواتین کے حقوق کی تحریک نے نمایاں کامیابیاں حاصل کیں، تاہم اب بھی خواتین کے سماجی اور سیاسی شعبوں میں کام کرنے میں رکاوٹیں حائل ہیں، ہم پاکستان کو اسلامی فلاحی ریاست بنانے کے لیے جدوجہد کر رہے ہیں۔

واضح رہے کہ پاکستان میں خواتین کو بااختیار بنانے کے ساتھ ساتھ ان کے تحفظ کے لیے بھی قانون سازی کی جا رہی ہے، بالخصوص حالیہ دنوں میں خواتین پر جنسی حملوں کے تناظر میں ہنگامی بنیادوں پر قانون سازی کا عمل آگے بڑھایا گیا۔

دوسری طرف کامیاب جوان پروگرام کے تحت بھی خواتین کو خصوصی اہمیت دی گئی ہے، اس پروگرام کے لیے سو ارب روپے کی جو رقم مختص کی گئی ہے، اس میں 25 ارب روپے خواتین کے لیے رکھے گئے ہیں۔

The post خواتین کو با اختیار بنانے کے لیے اپنی کوششیں جاری رکھیں گے: وزیر خارجہ appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/33msLPh
via IFTTT