موٹر وے: پنکچر گاڑی سے بھاری مقدار میں اسلحہ برآمد

راولپنڈی: موٹر وے پولیس نے بھاری مقدار میں اسلحہ اسمگلنگ کی کوشش ناکام بنا دی، کارروائی کے دوران ایک ملزم گرفتار دوسرا فرار ہونے میں کامیاب ہو گیا۔

تفصیلات کے مطابق موٹر وے پولیس ترجمان نے بتایا کہ موٹر وے ایم ٹو چکری کے قریب سڑک کنارے پنکچرگاڑی کھڑی تھی، جس سے بھاری مقدار میں اسلحہ برآمد ہوا ہے۔

پولیس کے مطابق ایک ہنڈا کار میں اسلحہ اسمگل کیا جا رہا تھا، تاہم وہ پنکچر ہو گئی تھی، پیٹرولنگ کے دوران پولیس اہل کار مدد کی غرض سے رک کر کار کی طرف بڑھے تو کار میں موجود دو افراد نے کار بھگا دی۔

تاہم اس دوران کار سے اسلحہ گرا، جسے دیکھ کر پولیس اہل کاروں نے کار کا تعاقب شروع کر دیا، کلر کہار کے قریب اسے روکنے کی کوشش کی گئی لیکن وہ نہ رکی، تاہم موٹر وے پولیس نے ناکہ بندی کر کے ملزمان کے گرد شکنجہ سخت کر دیا، جس پر ملزمان نے گاڑی موڑ کر ون وے پر ڈال دی۔

موٹر وے پولیس کے تعاقب کے آگے بے بس ہو کر ملزمان نے گاڑی چھوڑ کر فائرنگ شروع کر دی، تاہم پولیس اہل کاروں نے ایک ملزم یاسین کو گرفتار کر لیا جب کہ دوسرا فرار ہو گیا۔

گاڑی کی تلاشی پر 16 رائفلیں، 89 میگزینز، 48 پستول، 15300 راؤنڈ برآمد ہوئے، ابتدائی تفتیش سے پتا چلا کہ ملزمان اسلحہ پشاور سے لاہور اسمگل کرنے کی کوشش کر رہے تھے۔ بعد ازاں، موٹر وے پولیس نے گرفتار ملزم، برآمد شدہ اسلحہ اور گاڑی پولیس چوکی چونترہ کے حوالے کر دیے۔

The post موٹر وے: پنکچر گاڑی سے بھاری مقدار میں اسلحہ برآمد appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/2TKNYNg
via IFTTT