بھارت اور ویسٹ انڈیز کی سیریز کا شیڈول تبدیل

بی سی سی آئی نے اگلے ماہ  انڈین پریمیئر لیگ کی بڑی نیلامی کے پیش نظر ویسٹ انڈیز کے خلاف محدود اوورز کی سیریز کے شیڈول میں تبدیلی کی ہے۔

بورڈ آف کنٹرول فار کرکٹ ان انڈیا (بی سی سی آئی) نے آئندہ ماہ 12 اور 13 فروری کو ہونے والی انڈین پریمیئر لیگ (آئی پی ایل) کی بڑی نیلامی کے پیش نظر ان ہی تاریخوں میں ہونے والی ویسٹ انڈیز کے خلاف میچز کے شیڈول میں تبدیلی کی ہے۔

نئے شیڈول کے مطابق تیسرے ون ڈے اور پہلے ٹی ٹوئنٹی میچز کو ایک ایک دن آگے بڑھایا گیا ہے اس کے ساتھ ہی بورڈ نے یہ بھی تصدیق کی ہے کہ یہ تمام میچز صرف 2 گراؤنڈز پر کھیلے جائیں گے۔

اس دورے کا آغاز اب 3 میچوں کی ون ڈے سیریز سے ہوگا جو احمدآباد کے نریندر مودی اسٹیڈیم میں کھیلی جائے گی۔

یہ میچ اب 6، 9 اور 11 فروری کو ہوں گے، اس کے بعد دونوں ٹیمیں کولکتہ جائیں گی جہاں پہلا ٹی ٹوئنٹی انٹرنیشنل میچ اب 15 فروری کے بجائے 16 فروری کو کھیلا جائے گا، اس کے بعد بقیہ 2 ٹی ٹوئنٹی میچز سابقہ شیڈول کے مطابق 18 اور 20 فروری کو ہوں گے۔

واضح رہے کہ بی سی سی آئی اس سے قبل ملک میں بڑھتے ہوئے کورونا کیسز کو مدنظر رکھتے ہوئے میزبانی کے لیے متعین شہروں کی تعداد کم کرکے 6 شہروں تک لانا چاہتا تھا۔ بی سی سی آئی نے بتایا کہ یہ فیصلہ سفر کے دوران ٹیموں، میچ آفیشل، براڈ کاسٹرز اور دیگر عملے پر کورونا کے خطرے کو کم کرنے کے لیے کیا گیا ہے۔

The post بھارت اور ویسٹ انڈیز کی سیریز کا شیڈول تبدیل appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/3As4VjW
via IFTTT