جامشورو میں خوفناک حادثہ، 4 افراد جاں بحق

جامشورو میں انڈس ہائی وے تھوڑی پھاٹک کے قریب کوچ اور ٹرک میں تصادم ہوا ہے جس کے نتیجے میں 4 افراد جاں بحق اور 12 زخمی ہوگئے ہیں۔

اے آر وائی نیوز کے مطابق مسافر کوچ لاڑکانہ سے کراچی جا رہی تھی کہ انڈس ہائی وے پر تھوڑی پھاٹک کے قریب سامنے سے آنے والے ٹرک سے خوفناک تصادم ہوا۔

حادثے کے نتیجے میں 4 افراد موقع پر ہی جاں بحق ہوگئے جب کہ 12 افراد سے زائد زخمی ہوئے جن میں خواتین اور بچے بھی شامل ہیں۔

حادثے کے فوری بعد جائے حادثہ پر چیخ وپکار مچ گئی، پولیس، ریسکیو ادارے اور قرب وجوار کے رہائشی افراد وہاں پہنچ گئے اور زخمیوں کو مانجھند اسپتال منتقل کیا تاہم وہاں علاج کی ناکافی سہولتوں کے باعث زخمیوں کو مشکلات کا سامنا ہے جب کہ 6 زخمیوں کی حالت تشویشناک بتائی جاتی ہے۔

واضح رہے کہ انڈس ہائی وے سہون سے جامشورو تک انتہائی خراب حالت میں موجود ہے جہاں آئے روز حادثات رونما ہوتے رہتے ہیں، مذکورہ شاہراہ کی تعمیر ومرمت کا کام 5 سالوں سے جاری ہے تاہم آج تک مکمل نہیں ہوسکا ہے۔

from ARYNews.tv | Urdu – Har Lamha Bakhabar https://ift.tt/HmpQYul
via IFTTT