حجاج کرام کی وطن واپسی اتوار سے شروع ہوگی

اسلام آباد : پاکستانی حجاج کرام کی وطن واپسی 2 جولائی بروز اتوار سے شروع ہوگی، جدہ ایئرپورٹ سے پہلی تین حج پروازوں کے ذریعے693 حجاج کرام وطن واپس پہنچیں گے،

اس حوالے سے ترجمان مذہبی امور کی طرف سے ہفتہ کو جاری بیان کے مطابق پہلی حج پروازیں جدہ سے کراچی، فیصل آباد اور اسلام آباد پہنچیں گی۔

ترجمان نے کہا کہ جدہ سے حج فلائٹ آپریشن20 جولائی تک جاری رہے گا، حجاج کرام کی مکہ سے مدینہ روانگی کا آغاز5 جولائی سے ہو گا،38 ہزار حجاج کرام کو مدینہ منورہ بھجوایا جائے گا۔

ترجمان وزارت مذہبی امور کا مزید کہنا ہے کہ مدینہ منورہ سے آخری حج پرواز 2 اگست کو وطن واپس پہنچے گی۔

علاوہ ازیں وفاقی وزیرمذہبی امور سینیٹر محمد طلحہ محمود نے کہا ہے کہ حج مشن کی ٹیم نے بہت قلیل وقت میں بہتر انتظامات کیے۔

اپنے ایک بیان میں ان کا کہنا تھا کہ پاکستان حج مشن بعد از حج بھی حجاج کرام کو فراہم کی جانے والی سہولیات کو بہتر سے بہتر کرے، مکہ اور مدینہ منورہ میں حجاج کرام کی ہر طرح سے خدمت کی جائے۔

انہوں نے متعلقہ حکام کو ہدایات دی ہیں کہ حج مشن اگلے حج کے لیے ابھی سے تیاریاں شروع کر دے تاکہ اگلے سال عازمین کو بہتر رہائش ،خوراک اور ٹرانسپورٹ کی سہولیات فراہم کی جاسکیں۔

from ARYNews.tv | Urdu – Har Lamha Bakhabar https://ift.tt/esx43Vb
via IFTTT